ଚାଷ କ୍ଷେତରେ ଏବେ ଲାଲ ଟହ ଟହ ବିଲାତି ,କିନ୍ତୁ ଖୁସି ହୋଇପାରୁନି ଚାଷୀ । ବିକ୍ରି ମୂଲ୍ୟଠାରୁ ପରିବହନ ଖର୍ଚ୍ଚ ଅଧିକ ହୋଇଯାଉଛି। ସଠିକ ମୂଲ୍ୟରେ  ବିକ୍ରି ପାଇଁ ବଜାର ନାହିଁ କି ସଂରକ୍ଷଣ କରିବାକୁ ଶୀତଳଭଣ୍ଡାର  ନାହିଁ। ବିଲାତି ପ୍ରକ୍ରିୟାକରଣ ଶିଳ୍ପ ‘ବିଲାତି ଓଡ଼ିଶା’ ଚାଷୀଙ୍କ କାମରେ ଆସୁନି। ସ୍ଥାନୀୟ ବଜାରରେ ବିଲାତି କିଲୋ ମାତ୍ର ଦୁଇଟଙ୍କା ଥିବାରୁ କେନ୍ଦୁଝର ଜିଲ୍ଲାରେ ପୁଣି ରାସ୍ତାରେ ଢାଳିବା ପରି ସମୟ ଆସିଗଲାଣି। କିଛିଦିନ ତଳେ ତେଲକୋଇ ର କିଛି ଚାଷୀ ମଧ୍ୟ ରାସ୍ତା ରେ ବିଲାତି ଢାଳି ପ୍ରତିବାଦ କରିଥିଲେ। ଚାଷୀମାନେ ଏପରି ମୂଲ୍ୟ ପାଇଁ ସଂଘର୍ଷ କରୁଥିବାବେଳେ ବେପାରୀ ମାନେ ଏହାର ସୁଯୋଗ ନେବାକୁ ପ୍ରୟାସ କରୁଛନ୍ତି ।କେନ୍ଦୁଝର ସମେତ ରାଜ୍ୟର ବିଭିନ୍ନ ଅଂଚଳରେ ଚାଷ କ୍ଷେତରେ ବିଲାତି କିଲୋ ପ୍ରତି ୨ଟଙ୍କାରେ ମିଳୁଥିବା ବେଳେ ଭୁବନେଶ୍ୱର ବଜାର ରେ ବିଲାତିକିଲୋ ପ୍ରତି ଦଶଟଙ୍କା ଦରରେ ବିକ୍ରୀହେଉଛି ।

କେନ୍ଦୁଝର ଜିଲ୍ଲା ସଦର ବ୍ଲକର ମହାଦେଇଯୋଡ଼ା ପଞ୍ଚାୟତ ପନିପରିବା ଚାଷରେ ବେଶ୍‌ ଆଗୁଆ। ଏ ବର୍ଷ ପଞ୍ଚାୟତର ମହାଦେଇଯୋଡ଼ା, ଟକରପଡ଼ା, ଡାଳିମ୍ବାଡିହି, ମହାନ୍ତସାହି, ଶିମିଳି ସାହି ଆଦି ଗ୍ରାମରେ ପାଖାପାଖି ୫୦ ଏକରରରୁ ଊର୍ଦ୍ଧ୍ବ ଜମିରେ ବିଲାତି ଚାଷ ହୋଇଥିଲା। ଚାଷ ବେଳେ ଧାର କରଜ କରିଥିବା ଚାଷୀମାନେ ଅମଳ ପରେ ଶୁଝିବାକୁ ଲକ୍ଷ୍ୟ ରଖିଥିଲେ। ଏବେ ସେ ଲକ୍ଷ୍ୟ ପୂରଣ ହେବ ନାହିଁ ବୋଲି ସେମାନେ କହିଛନ୍ତି। କାରଣ ବିଲାତି ଯେଉଁ ମୂଲ୍ୟରେ ବିକ୍ରି ହେବା କଥା, ତାହା ହେଉନାହିଁ। କେବଳ କେନ୍ଦୁଝର ନୁହେଁ ଅନୁଗୁଳ ଗୁରୁବାର ହାତରେ ବିଲାତି କିଲୋ ୩ ଟଙ୍କା ହୋଇଯାଇଛି।ବନ୍ତଳା ଅଂଚଳର ଚାଷୀ କ୍ଷେତରୁ ବିଲାତି ତୋ  ନ ଥିବା କହିଛନ୍ତି ଅନୁଗୁଳ ଉଦ୍ୟାନ କୃଷି ଉପ ନିର୍ଦ୍ଧେଶକ ପଦ୍ମ ଲୋଚନ ସାହୁ ।