ସୋମବାର ପାଳିତ ହେଉଛି ବିଶ୍ୱ ବ୍ୟାଘ୍ର ଦିବସ । ଏ ଅବସର ରେ ଦେଶର ବାଘ ଗଣନା ରିପୋର୍ଟ ପ୍ରକାଶ ପାଇବ ।  ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସର୍ବ ଭାରତୀୟ ବାଘ ଗଣନା ରିପୋର୍ଟ-୨୦୧୮କୁ ଉନ୍ମୋଚନ କରିବେ। ୨୦୦୬ରେ ପ୍ରୋଜେକ୍ଟ ଟାଇଗରର ପୁନର୍ଗଠନ ପରେ ଏହା ଚତୁର୍ଥ ରିପୋର୍ଟ। ପ୍ରତି ୪ ବର୍ଷରେ ଥରେ ଦେଶରେ ବ୍ୟାଘ୍ର ଗଣନା ହୋଇଆସୁଛି। ୨୦୧୪ରେ ହୋଇଥିବା ଗଣନାରେ ଦେଶରେ ବାଘଙ୍କ ସଂଖ୍ୟା ୨୨୨୬ ଥିବା ଦର୍ଶାଯାଇଥିଲା । ଏହା ପୂର୍ବରୁ ୨୦୦୬ ରେ ଦେଶରେ ବାଘଙ୍କ ସଂଖ୍ୟା  ୧୪୧୧ ଏବଂ ୨୦୧୦ରେ ୧୭୨୬ ରହିଥିଲା। ତେବେ ଗତ ୪ ବର୍ଷ ମଧ୍ୟରେ ଦେଶରେ ବାଘଙ୍କ ସଂଖ୍ୟା ୧୮ରୁ ୨୦% ବୃଦ୍ଧି ଘଟି ୨୬୦୦ ଟପିବା ନେଇ ଆଶା ରଖାଯାଇଛି। ରାଜ୍ୟଗୁଡ଼ିକ ମଧ୍ୟରେ କର୍ଣ୍ଣାଟକ ୬୦୦ ବାଘଙ୍କ ସହିତ ପ୍ରଥମ ସ୍ଥାନରେ ରହିବ ବୋଲି ଅନୁମାନ କରାଯାଉଛି। ଏହା ପଛକୁ ମଧ୍ୟପ୍ରଦେଶ ଏବଂ ଉତ୍ତରାଖଣ୍ଡ ରହିପାରନ୍ତି।